МР-нь А. С. Пушкинэнь лемсэ Национальной библиотекасо ютась Михаил Васильевич Маторкинэнь повестень, ёвтнемань, баснянь, статьянь «Эрямось максови весть» пусмонть презентациязо.
Ушодовсь покшчись М. В. Маторкинэнь валонзо лангс «Вирь удало лей чиресэ» моросонть, конань морызь раськень артисткась Анна Атласова, культурань заслуженной важодицятне Раиса Щанкина ды Елена Воронина.

Мероприятиянь ветицятне – МР-нь сермадыцянь вейсэндявксось, национальной ды краеведческой литературань нупалесь – тешкстызь сёрмадеенть шкинемань кинзэ, ёвтызь, што лиссть «Мелиораторт» ёвтнемань, «Вармаковол» повестень ды ёвтнемань книганзо, «Сюрко кумбря» повестень, пеедькшнемань, ёвтнемань ды пьесань пусмозо. Ловность сонзэ пек интересной баснянзо, валморонзо, анокстасть покш книгань невтема.

Ларина Т. И, мокшонь ды эрзянь раськетнень регионютконь общественной организациянь исполкомонь прявтось, макссь Михаил Маторкиннэнь шнамонь конёв, тешкстызе путовксонзо тиринь литературантень, публицистикантень, радиовещениянтень.
«Эрямось максови весть» од пусмонть коряс эсензэ мелензэ-арсеманзо ёвтызе филологиянь наукань докторось Юрий Григорьевич Антонов. Целанек сон макссь Михаил Васильевичэнь шкинемантень покш литературоведческой питне, тешкстызэ сонзэ башка ёнксонзо.
МР-нь заслуженной важодицясь, «Литова» эрзянь авань вейсэндявксонь прявтось, «Ламзурь» ансамблянь ветицясь Раиса Борисовна Щанкина ваннызе сёрмадеенть журналистикань кинзэ-янонзо. Арсесь авторонтень ламо од сёрмадовкст, литературасо од изнявкст.

«Ламзурь» ансамблянь морыцятне казсть авторонтень мазый моро «Тиринь веле».
Меельцекс Михаил Васильевич ёвтнесь эзь эрямодонзо, литературань тевдензэ, морась эсензэ моронзо, ёвтась покш сюкпря весе сыцятнень туртов, казсь весень туртов эсензэ од книганзо.
Презентациясь ютась «Голос литературной Мордовии» клубонть программанзо коряс.